journal

Journal, m. acut. Est ce qui est du jour, Diurnum quod diei vnius opera efficitur. Et selon ce le Languedoc dit Journal, ou Journau pour une journée d'homme des champs, et mesure le contenu des vignes, terres, et prez par Journaux, tout ainsi que faisoient les Romains par Iugera. Et d'ici dépend la signification du terme Journalier, qui se prend pour celuy qui n'a pas une continuelle disposition, ains à chacun jour la varie. Et de là vient que Journal, qu'on dit aussi papier journal, se prend pour le livre du marchand ou banquier, auquel il enregistre par chacun jour sa negotiation en recepte et mise, vente et achapt. Le Grec luy donne un nom plus signifiant, l'appelant {{t=g}}éphêméris,{{/t}} Duquel mot Juvenal s'est servi. l'Italien dit conforméement au François, Giornale, Qu'il appelle aussi Bastardello, Comme dit Filippo Venuti. Mais c'est autant hors de la raison du mot Journal, comme Aduersaria en Latin. Mais Diarium. ou (comme dit Sueton. In Augusto) diurnus commentarius. La representent à plein. Le prendre pour Kalendarium, Il ne se peut: Car c'estoit le registre de chacun mois, où ceux qui bailloient deniers à profit et interest payable à chacun premier jour du mois (que les Romains appeloient Kalendae.) enregistroient les noms des debteurs d'iceux interests, et les sommes et sorts principaux à quoy ils estoient tenus, et mesmes aussi à quelle raison couroient lesdits profits.

Thresor de la langue françoyse. Jean Nicot.